галоўная | мапа сайту русский   

гарадскі пасажырскі транспарт у Баранавічах
аўтобусы | маршруты | маршрутныя таксі | навіны і падзеі | гісторыя | фатаграфіі | downloads | горад


схемы аўтобуса МАЗ-203



схема аўтобуса МАЗ-203С







аўтобус МАЗ-203 (фота ААТ МАЗ)



МАЗ-203 на выставе Мотор-Шоу-2005 у Маскве (фота Антона Чыграя)



МАЗ-203 на выставе АўтаТэхЭкспа-2007 у Мінску: маторны адсек



МАЗ-203 на выставе АўтаТэхЭкспа-2007 у Мінску



першы гомельскі аўтобус МАЗ-203 (фота Сяргея Паддубнага)



першы МАЗ-203 у Польшчы (фота Мацея Макулі)



першы МАЗ-203 у Польшчы — выгляд ззаду (фота Мацея Макулі)



першы МАЗ-203 у Польшчы — пярэднія ліхтары (фота Мацея Макулі)



першы МАЗ-203 у Польшчы — задняя частка салона (фота Мацея Макулі)



задняя частка салона



першы МАЗ-203 у Польшчы — пярэдняя частка салона (фота Яцэка Соботы)



першы МАЗ-203 у Польшчы — пярэдняя частка салона (фота Яцэка Соботы і Мацея Макулі)



першы МАЗ-203 у Польшчы — маторны адсек (фота Яцэка Соботы і Мацея Макулі)



першы МАЗ-203 у Польшчы (фота Мацея Макулі)
   галоўнаяаўтобусымаз-203

МАЗ-203

Ужо ў 2002 г., г.зн. усяго праз шэсць гадоў пасля выпуску першага аўтобуса МАЗ-103, прадстаўнікі заводу МАЗ, гаворачы аб бліжэйшых планах, узгадвалі распрацоўку і пачатак выпуску другога пакалення гарадскіх аўтобусаў. Аднак іх праектаванне пачалося толькі на пачатку 2004 г. і першы вопытны ўзор цалкам нізкападлогавага аўтобуса ўласнай канструкцыі МАЗ-203 быў прадстаўлены шырокай публіцы ў жніўні 2005 г. на 9-ай Маскоўскай міжнароднай выставе «Мотор-Шоу-2005». Трэба адзначыць, што тады мінскі аўтобус аказаўся па-за ўсякім параўнаннем з аўтобусамі, прадстаўленымі іншымі вытворцамі пасажырскага транспарту, значна перасягаючы іх як у плане знешняга выгляду, так і ў тэхнічным выкананні, за што і атрымаў спецыяльны прыз журы конкурсу «Аўтобус выставы». Нічога дзіўнага, бяручы пад увагу словы тагачаснага дырэктара МАЗа, Валянціна Гурыновіча, які паведаміў прэсе, што з гэтымі аўтобусамі прадпрыемства плануе з’явіцца на еўрапейскім рынку. Вясной наступнага года, на міжнародным аўтасалоне SIA-2006 у Кіеве, МАЗ-203 быў прызнаны лепшым гарадскім аўтобусам вялікага класу, а на Другім Міжнародным аўтатранспартным форуме, які праходзіў у Маскве восенню 2006 г., МАЗ-203 быў прызнаны «Лепшым гарадскім аўтобусам года». Апрача выстаў у Расіі і Украіне, аўтобус дэманстраваўся ў гарадах Расіі, Польшчы і Балгарыі. Пачатак серыйнага выпуску новага аўтобуса спачатку планавалася пачаць у красавіку 2006 г., потым плануемы запуск у серыю быў перанесены на другую палову 2006 г., а па стане на люты 2007 г. было вядома толькі пра 15 машын МАЗ-203 і МАЗ-203С (у Беларусі ен пазіцыяніруецца як прыгарадны, а ў краінах Заходняй Еўропы гэта двухдзверная версія гарадскога аўтобуса, прызначаная для эксплуатацыі на ненапружаных гарадскіх маршрутах).

МАЗ-203 (МАЗ-203С), у адрозненне ад папярэдніка, з’яўляецца цалкам нізкападлогавай машынай дзякуючы ўстаноўцы партальных мастаў, а гэта значыць, што ўзровень падлогі ў раене ўсіх трох (дзвюх) дзвярэй аднолькавы і складае 340 мм, што на 20 мм ніжэй, чым у раене пярэдніх і сярэдніх дзвярэй у МАЗ-103 і МАЗ-103С (а вышыня прыступкі над узроўнем дарогі пры выкарыстанні сістэмы «кнілінга» (kneeling) і таго менш — усяго 270 мм), няма ўхіла ў задняй частцы салона і прыступкі ў раене трэціх дзвярэй. Знешне аўтобусы МАЗ другога пакалення адрозніваюцца ад еўрапейскіх аднакласнікаў толькі наяўнасцю эмблемы «МАЗ» на «мордзе», бо выкананы яны ў адпаведнасці з еўрапейскімі тэндэнцыямі аўтобуснай «моды». Тут і ўклееннае шкло (пры гэтым адсутнічаюць профілі накладак на швах, злучэнні выкананы западліцо і замазаны спецыяльным клеем) з роўнай ніжняй лініяй ашклення, і стыльныя пярэднія ліхтары, і вялізнае панарамнае лабавое шкло без перамычкі. Ізюмінка аўтобусаў — задняе шкло ў выглядзе перавернутай трапецыі. «Выраслі» аўтобусы таксама ў тэхнічным і тэхналагічным плане. Асноўныя камплектуючыя пакуль імпартныя. Гэта добра знаемыя шасціцыліндравыя радныя 231- альбо 279-сільныя дызельныя рухавікі Mercedes-Benz OM906LA рабочым аб’емам 6,37 л, адпавядаючыя нормам таксічнасці EURO-3 альбо EURO-4 і дазваляючыя аўтобусам МАЗ-203 развіваць хуткасць 75 альбо 106 км/г у залежнасці ад выкарыстоўваемага сілавога агрэгата, а таксама шасціступеньчатая каробка перадач ZF 6HP502 альбо трохступеньчатая Voith Diwa 851.3E з гідрадынамічным тормазам-запавольвацелем, партальныя масты ZF, рулявое кіраванне ZF з пераменнай перадатачнай лічбай і гідраўзмацняльнікам, а таксама тармазы Knorr-Bremse. Рухавік, дарэчы, як і на аўтобусе МАЗ-103, размешчаны ў маторнай шафе ў заднім звесе. На МАЗ-203 рухавік размешчаны пад вуглом у дзевяць градусаў да падоўжнай восі. Цалкам мажліва, на аўтобусы апрача дызеляў Mercedes-Benz мажлівая будзе таксама ўстаноўка сілавых агрэгатаў Deutz і ММЗ. Таксама цалкам мажліва, што ў будучыні на змену замежным прыйдуць айчынныя вузлы і агрэгаты, што зробіць аўтобусы больш даступнымі для небагатых альбо эканомных пакупнікоў. Як гэта скажацца на надзейнасці саміх аўтобусаў, сказаць пакуль складана. Праўда, хуткага замяшчэння імпартных дэталяў айчыннымі чакаць, мабыць, не варта, бо нізкападлогавыя аўтобусы такога тэхнічнага і тэхналагічнага ўзроўня ў Беларусі дагэтуль не выпускаліся.

Кузаў аўтобусаў выкананы па тэхналогіі, падобнай да тэхналогіі вырабу кузавоў аўтобусаў першага пакалення — ен вырабляецца з ацынкаваных труб прамавугольнага і спецыяльнага сячэння. Праўда, канструкцыя каркасу кузава прынцыпова іншая — яна стала больш дасканалай і моцнай. Пластыкавыя панелі для кузава і інтэр’ера аўтобусаў выраблены ў Беларусі — у Лідзе і Асіповічах, сядзенні таксама беларускія, але на заказ можна паставіць і больш стыльныя імпартныя сядзенні. Паліўны бак і яго заліўная гарлавіна знаходзяцца над правым пярэднім колам адразу за пярэднімі дзвярамі.

Поўная маса аўтобусаў МАЗ-203 і МАЗ-203С складае 18 000 кг, маса аўтобуса МАЗ-203 ва ўзброеным стане — 11 100 кг і 11 270 у варыянце з кандыцыянерам. У выпадку з аўтобусам МАЗ-203С маса ва ўзброеным стане раўняецца адпаведна 10 800 кг і 11 000 кг. Дапушчальная нагрузка на пярэднюю вось складае 6 500 кг, на заднюю — 11 500 кг. Падвеска (як задняя, так і пярэдняя) — залежная пнеўматычная. Падвеска пярэдняй восі — двухбалонная, задняй — чатырохбалонная.

Усе колы гарадскіх аўтобусаў другога пакалення абсталяваныя дыскавымі тармазамі з пнеўматычным прывадам. Акрамя таго, машыны камплектуюцца сістэмамі ABS і ASR. Дыскавыя колы (8.25/22,5) «абутыя» ў шыны размернасцю 11/70R22.5.

Цікавая дэталь — аўтобусы МАЗ-203 і МАЗ 203С па заказе могуць быць абсталяваныя цэнтралізаванай сістэмай змазкі «Лінкальн» (Lincoln), пастаянна змазваючай малымі порцыямі ўсе асноўныя пункты, патрабуючыя змазкі. Гэтая сістэма самастойна падпампоўвае пластычную змазку пры дапамозе дазатараў ва ўсе неабходныя вузлы, шарніры і г.д. Яшчэ адна цікавая функцыя не знаемая па МАЗ-103 — бартавы камп’ютар. Інфармацыйная сістема, вырабленая ў Польшчы, уключае ў сябе адно ўнутранае табло і тры вонкавых і дазваляе звязацца з камп’ютарамі рухавіка і каробкі перадач. На невялікім маніторы вадзіцель можа адслежваць некаторыя параметры працы рухавіка, а таксама запісваць іх у памяць. Сістэма працуе таксама з GPS (спадарожнікавая навігацыя) і GSM (абмен дадзенымі). Навігацыйная сістэма дазваляе дыспетчару адслежваць месцазнаходжанне аўтобуса з дакладнасцю да 10 м. Аўтобус жа, знаходзячыся ў радыусе 100 м ад дыспетчарскай станцыі здольны перадаць ей усю неабходную інфармацыю, якая датычыць параметраў руху — сярэднюю хуткасць, колькасць прыпынкаў і г.д. Акрамя таго, разумная сістэма пры правільнай устаноўцы здольная без умяшання вадзіцеля аб’яўляць назвы прыпынкаў і адлюстроўваць іх назвы на табло, размешчаным унутры салона. Праўда, дзеля таго, каб устаноўка дадзенай опцыі мела сэнс, абсталяваць ею прыдзецца ўсе аўтобусы прадпрыемства ці аўтапарку, а таксама дыспетчарскія станцыі. Мусіць, аўтобусы для Беларусі будуць абсталяваны айчыннымі моўнымі інфарматарамі і інфармацыйнымі сістэмамі, вырабленымі прадпрыемствамі МЭМЗ і «Інтэграл», не такімі складанымі, як польская, і, адпаведна, не такімі дарагімі. Акрамя ўсяго іншага, на гарадскія аўтобусы другога пакалення ў якасці опцыі можна ўстанавіць пнеўмападвеску з электронным кіраваннем, дахавыя вентылятары і іншае дадатковае абсталяванне, якое патрабуе заказчык.

Кабіна вадзіцеля стала больш функцыянальнай і эрганамічнай. Панель прыбораў вядомай фірмы VDO адразу кідаецца ў вочы: яна моцна высунута ў кірунку вадзіцеля, што дазваляе апошняму з легкасцю знаходзіць і карыстацца неабходнымі пераключацелямі. Інтэр’ер салона аўтобуса МАЗ-203, умяшчаючага 101–105 пасажыраў (пры наяўнасці 26 альбо 28 сядзячых месцаў), адчуў заўважальныя змены, ен абсталяваны больш зручнымі выгнутымі поручнямі і кандыцыянерам (планавалася, што ен будзе ў базавай камплектацыі, аднак цяпер гэта опцыя). Стаячым пасажырам у МАЗ-203 адведзена плошча ў 9,8 кв.м.; у МАЗ-203С яна менш за кошт адсутнасці задніх дзвярэй і наяўнасці большай колькасці сядзячых месцаў (33–36). Стаячых месцаў у МАЗ-203С — 100–102. У аўтобусах МАЗ-203 і МАЗ-203С ужытыя трохі іншыя кампановачныя рашэнні ў параўнанні з аўтобусамі першага пакалення, у прыватнасці, бакавыя дзверы ў сярэдняй частцы салона ссунуты ў кірунку задняй восі, што, па думцы распрацоўшчыкаў, павінна зрабіць больш зручным працэс уваходу-выхаду, акрамя таго, за кошт гэтага ўдалося павялічыць накапіцельную пляцоўку. Уваход у пярэднія дзверы на выставачных і экспартных аўтобусах такі ж шырокі, як і ў астатніх дзвярах — ен не разделены надвое, як гэта было зроблена ў МАЗ-103, хоць, вадзіцелі і працаўнікі аўтапаркаў гэты «недагляд» хутчэй за ўсе паправілі б, калі да гэтага МАЗ не пачаў бы камплектаваць аўтобусы для айчыннага рынку цэльнай сценкай, аддзяляючай працоўнае месца вадзіцеля ад салона і дзелячай уваход у пярэдніх дзвярах надвое. Насупраць сярэдніх дзвярэй маецца павялічаная ў параўнанні з папярэднікам накапіцельная пляцоўка. Шырыня праходу паміж сядзеннямі складае 790 мм. Аднак, пасажырам наўрад ці спадабаюцца досыць высокія подыумы, размешчаныя над вядучым мостам, а таксама вузкі праход паміж сядзеннямі ў задняй частцы салона.

Гарадскія аўтобусы МАЗ з індэксам, пачынаючымся з «двойкі», сталі прадаўжальнікамі традыцый мінскіх аўтобусаў у вобласці барацьбы з патэнцыяльнымі ўзгараннямі ў маторным адсеку і абсталяваны сістэмай аэразольнага пажаратушэння. У выпадку перавышэння тэмпературы ў «зоне адказанасці» актывізуюцца размешчаныя там спецыяльныя датчыкі і пачынае працу сістэма пажаратушэння. Апрача таго, салон аўтобуса аздоблены вогнеўстойлівымі матэрыяламі.

Аўтобусы поўнасцю адказваюць еўрапейскім патрабаванням для перавозкі пасажыраў (Правілы ЕЭК ААН №№ 85, 107). МАЗ традыцыйна з’яўляецца адным з нямногіх вытворцаў пасажырскага транспарту ў СНД, які кіруецца пры стварэнні аўтобусаў не толькі айчыннымі, але і еўрапейскімі патрабаваннямі і нормамі, што датычацца перавозкі людзей з абмежаванымі мажлівасцямі. Гэтаму служыць сістэма т.зв. «кнілінга», дазваляючая аўтобусу «прысесці» на прыпынку альбо да яго «нахіліцца». Для палягчэння заезду ў салон інвалідных ці дзіцячых калясак прадугледжаны адкідваючыся трап. У салоне маюцца спецыяльныя месцы для мацавання інвалідных вазкоў.

Аўтобус МАЗ-203 прайшоў мноства выпрабаванняў, у т.л. праверку тармазоў у расійскім Дзімітраве, выпрабаванні на палігонах і стэндах, дзе правяралася праца рухавіка, рулявога кіравання, а таксама іншых вузлоў і агрэгатаў, шумлівасць і вібранагружанасць. Вопытны ўзор прайшоў усе выпрабаванні і атрымаў сертыфікат адпаведнасці.

Самы ж першы МАЗ-203, набыты для гарадскіх перавозак (чацверты па ліку аўтобус дадзенай мадэлі, сышоўшы са стапеляў Мінскага Аўтамабільнага Заводу), з’явіўся ў Польшчы ў прыватным транспартным прадпрыемстве ў г. Забжэ (Zabrze), уладальнікам якога з’яўляецца Тадэвуш Павіхроўскі (Tadeusz Powichrowski). Не абышлося, канешне, без некаторых «дзіцячых хваробаў»: па афіцыйна непацверджаных дадзеных, нараканні выклікалі працякаючая столь і карабацячыся ламінат; нізкая якасць зборкі і афарбоўкі дзвярэй, няроўная ўклейка лабавога шкла і нізкая якасць праклейкі большасці швоў у месцах уклейкі вокнаў, кепская якасць пластыку, з якога зроблена пярэдняя панель і крывізна швоў. Дзверка, раздзяляючая працоўнае месца вадзіцеля і салон, лопнула пасля першай тысячы кіламетраў прабегу, прычым (увага!), па меркаванні польскага боку, яна магла быць лопнуўшай яшчэ на заводзе, але дэфект мог быць скрыты з дапамогай шпаклеўкі і пафарбоўкі. Крытыцы паддадзена таксама адсутнасць на некаторых сядзеннях ручак для стаячых пасажыраў (прыкметна, што на адной пары сядзенняў ручка есць, але з боку акна — на фатаграфіі пярэдняй частки салона з левага боку за спінкай для інвалідных калясак бачна тая самая пара сядзенняў). Можна чакаць, што МАЗ зробіць работу над памылкамі і МАЗ-203 стане годным нашчадкам МАЗ-103.

Першы МАЗ-203, прызначаны для эксплуатацыі ў Беларусі, з’явіўся ў Гомельскім аўтобусным парку № 6 13 сакавіка 2007 г. На жаль, і тут не абышлося без тэхнічных накладак, з-за якіх аўтобус нават быў адпраўлены на мінскі аўтазавод. Праблема, па неафіцыйных дадзеных, была ў тармазах і зноў такі кепска прыклееным лабавым шкле. У Расіі МАЗ-203 упершыню выйшлі на маршруты Казані на пачатку красавіка 2007 г. Дарэчы, Казань стала першым горадам, які заключыў дамоўленасць на пастаўку вялікай партыі аўтобусаў МАЗ-203 (50 штук). 50 чырвоных МАЗ-203 для Казані былі аснашчаны рухавікамі Mercedes-Benz адпавядаючымі стандартам таксічнасці EURO-3 і аўтаматычнымі каробкамі перадач ZF. Дарэчы, эксплуатацыя аўтобусаў у Казані дазволіла выявіць чарговы канструктарскі пралік — аслабяваючыя мацаванні панэляў кіравання. У Мінску ж пачатак эксплуатацыі МАЗ-203 спачатку быў прызначаны на першую палову 2007 г., потым на другую палову 2007 г., а потым перасунуты на 2008 год. Відочна, гэта было звязана з праблемамі зборкі першых аўтобусаў, і Мінск пакуль проста не адважваўся іх купіць. Урэшце, на пачатку 2008 года на МАЗе пачала збірацца партыя з 50 шэрых аўтобусаў для Мінска, першы з якіх з’явіўся на маршруце 14 лютага. Ужо пасля пачатку паставак МАЗ-203 Мінсктрансам было прынятае рашэнне заблакіраваць палову пярэдніх дзвярэй ад адкрыцця і ўстанавіць аграджэнне ў завадскіх умовах, для чаго пастаўленыя аўтобусы былі накіраваны на завод. Гэта было зроблена для таго, каб не абмяжоўваць абзорнасць для вадзіцеляў. Зноў-такі, у аднаго з мінскіх МАЗ-203 з’явілася трэшчына на лабавым шкле і трэснула сетка маторнага адсека. Вадзіцелі ж скардзяцца на вузкую кабіну і цвердую пярэднюю падвеску. У давяршэнне ўсяго негатыву, па інфармацыі з неафіцыйных крыніц на МАЗе, размешчанай у інтэрнэце, стала вядома пра тое, што формы на каркас аўтобусаў МАЗ-203 адліваюцца бракованымі і хутка ржавеюць. Пачынаючы з вясны 2008 г. партыя аўтобусаў для Мінска пачала фарбавацца ў стандартны зялены колер.

У маі 2007 года першым аўтобусам МАЗа, адпавядаючым экалагічнаму стандарту EURO-4 стаў менавіта гарадскі аўтобус другога пакалення МАЗ-203076, аснашчаны рухавіком Deutz 2013. Дадзены аўтобус быў прадстаўлены на Міжнароднай выставе пасажырскага транспарту «Мабільнасць і гарадскі транспарт-2007», якая прайшла ў г. Хельсінкі з 21 па 25 мая 2007 года. На дадзенай выставе Мінскі аўтазавод прыняў удзел упершыню. Адразу пасля заканчэння выставы аўтобус адправіўся ў эстонскі г. Тарту, дзе адбылася яго прэзентацыя для перавозчыкаў і адміністрацыі горада. Увогуле, у 2007 г. МАЗ-203 актыўна «катаўся» па айчынных і замежных выставах, сярод якіх былі «АўтаТэхЭкспа-2007», «Комтранс-2007», «Гаспадарчая Выстава Беларусі» ў Польшчы і іншыя.

У канцы лета 2007 г. 2 МАЗ-203 з’явіліся ў Віцебску (у канцы восені ўжо было каля 7), прыкладна ў той жа час МАЗ-203 з’явіўся ў Полацку, а на пачатку восені прыйшла чарга Украіны — у Данецку з’явілася некалькі дзесяткаў МАЗаўскіх гарадскіх аўтобусаў другога пакалення. Восенню ж 2007 года быў сабраны 100-ты аўтобус гэтай мадэлі. Да канца 2007 г. аўтобусы МАЗ-203 з’явіліся і ў Казахстане, а таксама ў чарговых расійскіх гарадах — Краснаярску і Самары.

Вясною 2008 г. аўтобусы МАЗ-203 пачалі досыць актыўна набывацца польскімі перавозчыкамі. Так, у сакавіку 4 аўтобусы набыло прадпрыемства Forbus з г. Быдгашч (у канцы красавіка прыйшло дадаткова 3 аўтобусы), а фірма Warbus з г. Элк пасля набыцця чатырох аўтобусаў МАЗ-226 папоўнілася яшчэ 2 аўтобусамі МАЗ-203. У канцы чэрвеня 2 МАЗ-203 з’явіліся і ў Кельцах у камунальнага перавозчыка MPK Kielce. У жніўні аўтобус МАЗ-203 прыватнага перавозчыка з’явіўся на вуліцах польскай сталіцы. Да жніўня 2008 г. аўтобусы МАЗ-203 з’явіліся і ў расійскім горадзе Саратаве. У жніўні 2008 г. пачаліся і выпрабаванні аўтобуса з завадскім нумарам 0000140 ў Маскве ў 14-м парку МасГарТранс.

У першай палове 2008 г. было вядома аб некалькіх кузавах для тралейбусаў на базе МАЗ-203 для Смалявіцкага прадпрыемства «ЭТОН». У гэтым жа годзе тралейбусы МАЗ-Этон-203Т пачалі вырабляцца ў заўважальнай колькасці; быў нават падпісаны кантракт на пастаўку 10 падобных тралейбусаў у Румынію. Неафіцыйна вядома таксама аб намеры Украіны набыць пробную партыю «рагатых» машын.

У студзені 2009 г. па адным МАЗ-203 з’явілася ў аўтобусных парках Салігорска і Маладзечна.

На дадзены момант МАЗ-203 эксплуатуюцца ў Беларусі, Германіі, Польшчы, Румыніі, Расіі, Украіне, Казахстане і Азербайджане. У красавіку 2008 г. МАЗ выіграў тэндэр на пастаўку 40 аўтобусаў МАЗ-203 у Румынію, а на пачатку жніўня стала вядома аб намеры гэтай краіны купіць 90 аўтобусаў МАЗ-203.068, абсталяваных рухавікамі Mercedes-Benz стандарта EURO-4 з выхлапной сістэмай на даху.

Калі верыць заявам прадстаўнікоў Мінскага Аўтамабільнага Заводу, у 2010 г. будзе поўнасцю завершана абнаўленне лінейкі выпускаемых гарадскіх, прыгарадных і турыстычных аўтобусаў. На справе гэта азначае, што ў гаме АМАЗ з’явяцца таксама сучленены гарадскі аўтобус МАЗ-205 (рызыкну меркаваць, што на гэты раз «гармонік» будзе нізкападлогавым з размяшчэннем рухавіка ў заднім звесе другой секцыі) і поўнасцю нізкападлогавы трохвосевы аўтобус МАЗ-207.

Тэхнічныя характарыстыкі аўтобуса МАЗ-203 можна падглядзець на афіцыйным сайце Мінскага Аўтамабільнага Завода. Там жа можна знайсці і тэхнічныя характарыстыкі аўтобуса МАЗ-203С.

МАЗ-203 у Мінску МАЗ-203 у Мінску МАЗ-203 у Мінску МАЗ-203 у Кельцах МАЗ-203 у Кельцах МАЗ-203 у Кельцах
МАЗ-203 у Мінску МАЗ-203 у Кельцах


Пры падрыхтоўцы артыкула выкарыстаныя фатаграфіі
— Сяргея Паддубнага (http://www.gomeltrans.net/)
— Антона Чыграя (http://www.bus.ruz.net/)
— Мацея Макулі і Яцэка Соботы (http://www.wpk.katowice.pl/)

Пры падрыхтоўцы артыкула выкарыстаныя фатаграфіі і схемы з афіцыйнага сайту ААТ «Мінскі Аўтамабільны Завод» http://www.maz.by/


Дадатковая інфармацыя
спіс баранавіцкіх аўтобусаў (Яўген Шпак)

Рэкамендаваныя ўнутраныя спасылкі
гісторыя грамадскага транспарту ў Баранавічах
інфармацыя актуалізаваная 1.04.2011 г.

аўтобусы | маршруты | маршрутныя таксі | навіны і падзеі | гісторыя | фатаграфіі | downloads | горад
   аб праекце postmaster@bartrans.net © http://bartrans.net/ Дубровін Яўген 2006-2018