Сення на 28 дзеючых гарадскіх маршрутаў ў Баранавічах штодзенна выходзяць больш за сотню аўтобусаў. Іх склад прадстаўлены чатырма вытворцамі з двух краін — з Беларусі (МАЗ, Амкадор, Неман) і Венгрыі (Ікарус).

На пачатку 90-х гадоў у сферы пасажырскіх перавозак у краіне ўвогуле і канкрэтна ў нашым горадзе склалася вельмі няпростая сітуацыя ў сэнсе абнаўлення рухомага складу. Аджыўшыя свой век аўтобусы не было магчымасці своечасова замяняць новымі і перавозкі ажыццяўляліся аўтобусамі, якія перакрочылі разліковы час сваей эксплуатацыі нават на больш за дзесятак гадоў. Кіраўніцтва Аўтобуснага Парку № 2 рознымі шляхамі шукала выхаду з гэтай непрыемнай сітуацыі, менавіта купляючы аўтобусы ЛіАЗ-5256 ці два экзатычныя для Беларусі польскія аўтобусы Ельч-120М. Варта таксма ўзгадаць адзін набыты аўтобус завода Амкадор у Пінску сабраны з машынакамплекта Ікарус-280 — Амкадор-10126.

Пачынаючы з сярэдзіны 90-х гадоў асноўным напрамкам палітыкі абнаўлення рухомага складу было набыцце ўжываных аўтобусаў Ікарус-260 і Ікарус-280 у Германіі, тэхнічны стан якіх быў на парадак вышэйшы ад падобных аўтобусаў у нас, а таксама капітальны рамонт аўтобусаў на Гомельскім АРЗ.

Пасля таго, як кіраўніцтвам краіны было прынята рашэнне аб спыненні ажыццяўлення фінансавай дапамогі для набыцця ўжываных аўтобусаў з Еўропы, Аўтобусны Парк № 2 звярнуўся да айчынных вытворцаў.

У апошнія гады актыўна вядзецца праца па замене старога складу новымі аўтобусамі вытворчасці філіяла Мінскага Аўтамабільнага Завода АМАЗ. На пачатку былі набыты тры аўтобусы МАЗ-103 з нізкай падлогай, але практыка эксплуатацыі паказала іх недастатковую прыстасаванасць да стану пакрыцця нашых вуліц. Далей набываліся аўтобусы МАЗ-104 і ў якасці альтэрнатывы Ікарусам-280 — МАЗ-105. Пры чым слова «альтэрнатыва» не поўнасцю адлюстроўвае рэчаіснасць, бо ў Беларусі толькі МАЗ вырабляе аўтобусы падобнага класа.

У кветні 2006 года Баранавічы сталі трэцім горадам у краіне, на вуліцах якога распачалася сталая эксплуатацыя аўтобуса дагэтуль неспатыканага ў нас класу адзіночных трохвосевых машын. Аўтобус МАЗ-107 — амаль пятнаццаціметровай даўжыні, займае нішу паміж адзіночнымі аўтобусамі МАЗ-103/104 і сучлененым аўтобусам МАЗ-105. У тым жа 2006 годзе ў аўтагаспадарства зноў паступіў нізкапольны аўтобус МАЗ-103, і далей час ад часу купляліся менавіта гэтыя аўтобусы.

2007 год стаў першым годам, калі ў Баранавічы пачалі пастаўляцца гарадскія аўтобусы Неман-5201. Да гэтага апошнімі лідскімі гарадскімі аўтобусамі, якія прыйшлі ў наш горад, былі Неман-5256 — амаль дакладная копія расійскага ЛіАЗ-5256.

Зімою 2007/2008 года ў Баранавічах з'явіліся 2 першыя гарадскія аўтобусы МАЗ другога пакалення — МАЗ-206. Нажаль, гэтыя аўтобусы, прызначаныя для слаба загружаных гарадскіх маршрутаў (як гэта зроблена, напрыклад, у Гародні, Гомелі і Берасці), па незразумелай пакуль прычыне выкарыстоўваюцца выключна на прыгарадных маршрутах.